Preguntanan frequente
Mira cu si bo por haña bo pregunta
Con por haya contacto cu Bureau Sostenemi?
| Por tuma contacto cu nos directamente na e number 588 10 10.
Pa urgencia yama 911 |
Ki ora mi por jama?
| Bureau Sostenemi ta disponibel di dialuna pa diabierna.
07:30 – 12:00 13:00 – 16:30 Telefoon 588 10 10 |
Ki lo pasa ora mi jama?
| Un trahador social di ‘frontoffice’ lo skucha bo preocupacion(nan). Hunto lo wak kico ta pasando y kico bo persona lo por hasi ainda. E trahador lo contesta preguntanan y ta duna conseho. Si ta necesario por hasi un reporte. En caso mester hasi un reporte e trahador lo splica e pasonan cu lo mester tuma pa hasi esaki. |
Mi por yama polis pa abuso di mucha?
Si tin peligro inmediatamente por yama polis. Yama na 100.
Kico ta señalnan di abuso di mucha?
Abuso por ta dificl pa mira. Tin diferente señalnan cu bo por observa. Keto y comportacion di isolacion of net comportacion hopi druk. Spanta ora mishi, hopi biaha tin golpi/heridanan na partinan di curpa straño y splicacion cu no ta cuadra pa cu esakinan. Pero tambe un apariencia di falta di cuido, pañanan kibra y of sushi, cabey no laba y curpa sushi. Por ultimo mayornan cu ta grita nan yiunan of cu ta papia negativo riba nan yiunan.
E descripcion mas amplio di señalnan bo por haya bou formanan di abuso.
Ki ta e formanan di abuso di mucha?
Nos ta hasi diferencia den 6 tipo di abuso di mucha:
Abuso fisico
Negligencia fisico
Negligencia emocional
Abuso psikico
Abuso sexual
Testigo violencia entre pareha
Aki por haya un descripcion di e señalnan di formanan di abuso di mucha.
Kico Bureau Sostenemi ta haci?
Bureau Sostenemi ta e punto central pa conseho y reporte di abuso di mucha pa Aruba. Bo por aserca pa conseho of kier hasi un reporte. Nos trahador di ‘frontoffice’ ta wak hunto cu bo e pasonan cu bo por tuma, si tin mester di ayudo profesional y cual ta e mihor tipo di ayudo.
Mi por haci un notificacion anonimo?
Bureau Sostenemi tin mester di bo nomber y bo datonan den tur caso.
Si bo persona como ciudadano no ta desea di duna bo nomber y bo datonan na e famia, nos no ta divulga e informacion na nan. Ni tampoco na otro persona. Sinembargo, nos ta discuti cu bo si e impacto di un notificacion anonimo por tin riba un famia. E experencia ta demostra cu ta util pa e famia sa ken a haci e notificacion y pakico. Pero e decision ta keda na bo persona.
Si bo ta un profesional y bo ta resorta bou di e Codigo di Proteccion, na prome luga bo ta revela bo preocupacionnan na e famia y pakico bo ta desea di notifica. Solamente den situacionnan excepcional ta posibel pa no divulga bo identidad na e famia. Nos empleadonan na e departamento di recepcion por discuti e posibilidadnan y e consecuencianan di esaki.
Con mi ta bisa un mucha y su mayornan cu mi ta bay haci un notificacion na Bureau Sostenemi?
Si bo persona ta preocupa pa un mucha, semper ta importante pa cuminsa papia cu e mucha y e mayornan. Mas cu claro si bo tin e oportunidad pa haci esaki por supuesto. Ta importante pa tene e combersacionnan aki prome cu bo dicidi di notifica. E combersacionnan aki por produci un imagen hopi diferente y talbes bo no tin rason pa haci e notificacion. Of por tambe cu bo a mira un inkietud confirma den e combersacionnan y bo ta splica pakico bo kier haci un notificacion toch. Ta bon si pa bo bisa acerca cu bo kier notifica pa mehora e situacion di e mucha. Bureau Sostenemi hunto cu e mayornan y e yiunan ta sinta pa wak e miho manera pa yudanan. Riba e pagina di nos website di “Combersacion cu e mucha y combersacion cu e mayornan” bo ta haya e consehonan cu por yuda bo pa haci e yamadanan.
Pakico Bureau Sostenemi ta papia cu mi yiu?
E notificacion cu nos a haya ta principalmente ta tocante bo yiu. Pa por evalua con ta cu bo yiu, e combersacion cu bo yiu ta indipensabel. P’esey nos kier sa con ta bay cu bo yiu. Ki problema y deseo bo yiu tin y kico e ta kere cu e tin mester?
