Abuso sexual

Abuso sexual ta nifica cu un adulto ta impone su actonan sexual y/of ta mishi cu e mucha. Esaki ta implica mishi cu e partinan priva of pecho di un mucha. Masturba dilanti di un mucha y/of hinca esaki den boca di un mucha, vagina of e chanchan ta un forma di abuso sexual. Loke tambe ta cay bou di abuso sexual ta ora cu un adulto ta persuadi e mucha pa wak material pornografico of laga e mucha mishi cu su partinan priva. Keda wak un mucha hopi largo tambe ta un ehempel di abuso sexual.
Abuso sexual familiar por pasa cu baby, cu mucha chikito y tin biaha esaki ta sigui te na e edad adulto di e mucha. Hopi biaha ta sigui un periodo largo di preparacion prome cu e abusado a cumpli cu su abuso sexual. E abusado sa hopi bon con pa manipula e mucha, di tal manera cu e mucha ta cuminsa pensa cu e mes ta responsabel di e abuso.

Hasta e mucha ta bay pensa cu ta pa su culpa door cu e no a resisti of ta pasobra el a acepta e manipulacion di su abusado. E muchanan cu a sufri un abuso sexual hopi biaha ta sinti nan mes culpabel y cu berguensa. P’esey den mayoria caso nan no ta conta ningun hende loke a pasa cu nan. Hopi biaha nan ta keda den silencio pasobra nan tin hopi miedo. Den cierto caso e abusado ta menasa cu violencia (“mi ta mata bo, si bo habri bo boca”) of e mucha ta haya miedo pa e consecuencianan di por ehempel (“bo mama ta bay manda bo na un internado si nos divorcia”).

E consecuencianan di un abuso sexual por ta hopi profundo tanto na plaso cortico of plaso largo. E mucha ta haya su mes ta enfrenta cu insiguridad den un relacion cu un adulto den cua el a spera di sinti siguridad di dje. Esaki ta debilita e confiansa no solamente den e abusado sino den otro hende en general. E sensacion di desconfiansa tin consecuencia profundo tambe pa cuminsa cu un relacion. E hecho cu un mucha ta tene secreto y ta experimenta e cosnan cu su compañeronan no ta experimenta ta haci cu e muchanan ta bira victima di isolacion. E muchanan ta enfrenta conflicto de lealtad mayoria biaha. Por ehempel nan tambe ta yega na stima nan abusado of pasobra nan ta acepta regalo di nan abusado. Tin biaha nan mes ta sali pa busca regalo. Como resultado, e muchanan ta keda mas confundi y insigur ainda.

E adultonan cu den nan hubentud a keda abusa sexualmente mayoria biaha ta desaroya sintomanan psicologico como tambe problema di drumimento, depresion y ansiedad. E problemanan pa establece limitenan tambe ta comun. Como adulto, nan tambe por desaroya un rechaso di persona y/of di nan mes.Esaki por provoca depresion, problema pa drumi y adiccion. E abuso sexual di un persona adulto por trece problema cu su propio sexualidad te na problema den relacion cu otro y diferente problema di salud.

Abuso sexual di un mucha ta hiba na diferente señal. Hopi di e señalnan aki no ta tipico di un abuso sexual. Esaki por ta tambe den otro forma di abuso infantil.

• Dolor di barica constantemente y ta inexplicabel;
• Problema di alimenticion;
• Problema di drumimento;
• Miedo di scuridad;
• Temor den anochi;
• Cambio direpiente di humor;
• Miedo pa keda so cu cierto adulto;
• Recaida den e desaroyo: orina na cama, chupa dede of sinti incomodo;
• No kier papia di e secreto cu e mucha tin cu e adulto;
• Tin dirpiente hopi placa of regalo;;
• Comportamento sexual cu no ta cuadra cu su edad.

E señalnan mas specifico[1] di abuso sexual cerca e muchanan di 0 pa 4 aña ta:

Fisico:

• Daño na e parti priva di e mucha;
• Infeccion vaginal y fluho vaginal;
• Grawatashi na e vagina of na e chanchan;
• Dolor di musculo;
• Dolor ora di cana of dificultad pa orina;
• Infeccion di canal di orina;
• Malesanan transmiti sexualmente.

E comportamento

• Ta primi su pianan contra di otro ora di cana;
• Asco di contacto fisico;
• Duna e impresion di ta ausente ora di un examen fisico.

E señalnan aki nos mester wak nan mas leu posibel y como prueba pa profundisa den e situacion di e mucha y su famia. Pa e profesionalnan ta un señal y un rason pa tuma paso 1 di e Codigo di Proteccion.

[1] Wolzak, A. Kindermishandeling: signaleren en handelen Utrecht, NJi 2012

https://www.rijksoverheid.nl/onderwerpen/kindermishandeling/vraag-en-antwoord/hoe-herken-ik-seksueel-misbruik-bij-een-kind

https://www.nji.nl/nl/Kindermishandeling-Probleemschets-Definitie/Seksueel-misbruik

Wolzak, A. Kindermishandeling: signaleren en handelen Abuso infantil: Señalnan y intercambio Utrecht, NJi 2012