Descuido fisico

Descuido fisico tin di haber cu e cosnan cu e mayornan no ta haci of no ta haci suficiente. E muchanan tin cierto necesidadnan basico pa sinti nan mes satisfecho pa desaroya na un manera saludabel y ekilibra. E necesidadnan basico ta inclui cuminda, bebida, cuido, paña, proteccion y un dak riba nan cabes.

E Babynan tin mester di suficiente alimentacion saludabel pa nan crece. E muchanan un poco mas grandi mester di suficiente supervision pa evita cu nan ta cay den e situacionnan peligroso. E muchanan den edad escolar mester bay scol pa haya educacion y pa tin contacto cu nan compañeronan. Asina tin hopi ehempel di cuido cu un mucha mester. Si e mayornan no satisface e necesidadnan basico, esaki ta nifica un descuido di nan yiunan. Esaki no ta implica necesariamente un compartamento culpabel di parti di e mayornan. Descuido of negligencia hopi biaha ta bin di impotencia y incapacidad. Incluso si e mayornan no tin suficiente opcion, por ehempel pasobra nan tin un discapacidad intelectual, un problema psikiatrico of un enfermedad cronica grave nos ta papia di descuido of negligencia.

E muchanan chikito cu no ta come ni bebe lo suficiente por sufri retraso den nan desaroyo di crecemento. Si e mayornan no propociona un supervision adecua, su yiu por cay for di cama of for di trapi. Como resultado di e negligencia fisico, por sosode cambio di comportamento di e muchanan. Por ehempel nan ta yora hopi y inconsolablemente. Nan no ta haci contacto visual ni nan ta reacciona adecuadamente na e contacto humano. E desaroyo di e habilidad motorico y di habla ta keda retrasa. E muchanan cu no ta adecuadamente bisti, cu friu of no ta come saludabel ta bira malo.

E descuido fisico por tin diferente consecuencia dañino pa e mucha. No solamente riba plaso cortico pero tambe na largo plaso despues cu e mucha a yega su edad adulto.

E consecuencianan den forma di negligencia principalmente nos por wak den bienestar fisico di e mucha. Pero tambe e comportamento di e mucha ta cambia debi na e negligencia fisico.

E kehonan y comportamento cu bo ta wak den e muchanan cu descuido fisico ta inclui:

• Peso abou y retraso den desaroyo;
• Yoramento frecuente y inconsolabel;
• Hopi biaha cu pieu;
• Rash na curpa door di bruki;
• Mal bisti;
• Paña hole malo;
• Djente mal cuida, djente putri
• Retraso den desaroyo psicomotorico y habla

Tur e señalnan aki ta nifica cu nos nos no por wak nan como prueba cu un mucha ta den un situacion di abuso. E señalnan aki mester wak nan como un estimulo pa wak mas leu y profundisa den e situacion di e mucha y su famia. Pa e profesionalnan e señalnan aki ta un rason pa aplica paso 1 di e Codigo di Proteccion.

https://www.augeo.nl/kindermishandeling/getuige-van-partnergeweld

https://www.nji.nl/Vormen-Kinderen-die-getuige-zijn-van-huiselijk-geweld

Berge, I. ten, A. Addink., M. de Baat ., C. Bartelink., J. van Rossum., y A. Vinke (2012). Para y yuda (‘Stoppen en helpen:) Un contesta adecua pa e abuso infantil (‘Een adequaat antwoord op kindermishandeling.’) Utrecht/Amsterdam: Instituto pa Hubentud (‘Nederlands Jeugdinstituut/SWP’).